TRI FRANCISCHI E LLA FHEDI
di Ciccio Scalise (05 maggio 2013)
U duamilatridici, anu vulutu fhari,
ppì bbuluntà Papali,
annu dà Fhedi, ppì Pprigari,
nò ssulu i fhesti, puru i fhiriali.
Iu, subbitu, ajiu pinzatu,
a qquanta Fhedi anu avutu,
dua grandi Fhrancischi, dù passatu,
e quanta ggenti anu Cumbirtutu.
U primu, u Povariallu Assisi,
chi giuviniallu, sì spugliau,
a Ppridicari u Vangelu sì misi,
e ogni beni c’avia, u dunau.
Notti e jjiuarnu, a Ddiu Prigava,
ppì llì soffirenzi dì povari, ch’eranu tanti,
puru ccù ll’animali parrava,
ed’è statu unu dì cchjiù rrandi Santi.
Nua Calabrisi, simu stati fhurtunati,
pirchì, ppì Ddivozioni ad’Illu, amu avutu,
n’autru Fhranciscu, chì ndà varcatu strati,
ppìmmu allu Cummiantu sua ha jjiutu.
E mentri llà, nù Vutu scuntava,
era ccriaturu, ma già si vidia,
ca Prigava ccumu nù randi, e ss’azava,
senza chi nenti sutta i piadi avia.
Dopu i tandu, quantu ha ggiratu,
e ccù quanta Fhedi, sapia Pprigari,
chi puru i rignanti, i nduvi è statu,
sulu ccù pparoli, i fhacia ttrimari.
Moni, n’autru Fhranciscu, è arrivatu,
chi ppì ffari u Papa, i luntanu ha bbinutu,
nduv’era, tanta fhedi ha ddimustratu,
cumbattiandu ppì llì povari, ogni minutu.
Mò, chè Ppapa, nenti è ccangiatu,
a Fhedi chi teni, si tocca ccù llà manu,
ogni povaru o malatu, cà bbistu, ha abbrazzatu,
cumu avessi ddì fhari, ogni bbuanu Cristianu.
I Sambiasini, a llù nuastru, ricunuscenti,
nù bbellu dipintu, cci’amu fhattu fhari,
nduvi, ccù llà manu, mbita tutta e genti,
mù trasi ntrà Ghjiasa, aperta, a Pprigari.
I primi dua, sù Ssanti e llì Viniramu,
u terzu è Papa, mà Fhideli o nò, l’amamu.